“Traumatic symptoms are not caused by the event itself, they arise when residual energy from the experience is not discharged from the body”
Peter Levine
Mae’r profiad somatig (Somatic Experiencing®) yn rhoi persbectif newydd a gobeithiol ar drawma. Mae’n ystyried y bod dynol yn un sydd â gallu cynhenid i wella drwy ddysgu sut i sylwi ar synwyriadau yn y corff a’u dilyn hyd at bwynt lle mae’r corff yn gwneud yr hyn sy’n angenrheidiol iddo deimlo’n ddiogel eto.
Mae llawer o bobl, yn ystod eu hoes, yn wynebu heriau a rhwystrau yn eu gallu i ymateb i straen. Er mor llesol ydi siarad, dydy hynny ddim yn ddigon i fynd i’r afael â’r hyn sy’n digwydd yn ffisioleg ein corff. Mae ein system nerfol awtonomig yn gymhleth, ac mewn diwylliant sy’n ein hamddifadu o realaeth ein cyrff, gall fod yn anodd iawn cael yr help priodol.
Mae’r dull hwn o weithredu yn dod â’r synwyriadau, ein profiadau corfforol, ac ystyr at ei gilydd. Pan fyddwn ni’n dioddef trawma, rydyn ni’n colli ein bywiogrwydd. Mae’r profiad somatig yn ffordd hynod effeithiol o fynd ati i adfer y teimlad hwnnw.
Gydag amser, fe ddown i deimlo ein synwyriadau a’n hemosiynau’n llawnach. Byddwn ni’n dechrau deall sut mae ein corff cyfan yn ymateb i straen sefyllfaoedd bob dydd, a deall sut mae’r ffordd y mae ein corff yn ymateb yn amharu ar ein hiechyd a’n lles. Byddwn ni’n dysgu sut i gynnal ein hunain mewn cyfnodau heriol a sut i ddefnyddio gofal a charedigrwydd yn offer i’n helpu ni.
Gallai ein symptomau ymddangos fel iselder, gorbryder, a bod yn gaeth i rywbeth. O dan yr wyneb, wrth inni fwrw ymlaen â’n bywydau, efallai ein bod ni’n teimlo’n wag, yn drist neu’n flin. Maes o law, gallwn ni ddysgu sut i ymlacio a byw yn y foment, a bod yn llwyr ymwybodol o’n teimladau a’n synwyriadau. Dyna’r wybodaeth a fydd yn ein helpu i wneud dewisiadau da am yr hyn sy’n llesol â’r hyn sy’n niweidiol inni yn ein bywydau.
Rwy’n cyfuno’r gwaith hwn gyda seicotherapi a dulliau sy’n seiliedig ar y celfyddydau a’r corff. Maen nhw’n annog perthynas ddwysach â’r corff, ein bywiogrwydd a’n dychymyg ar ein taith tuag at iechyd.
